إبرة أحلامى

موضوع كبير صراحة، الشاب أو الشابة من أول سن 16 مثلاً لغاية ما يتأهلوا بيفكروا فيه، يعنى الواحد بيقضى فى المتوسط 10 سنين من عمره - يعنى 15% من حياته على الأقل و يمكن توصل 30% بيدور على شخص تانى يستحمله ال50% اللى باقية من عمره

مشكلة كبيرة طبعاً، بعيد بقى عن موضوع نصيب و قسمة و توفيق و سميرة و الكلام الحلو اللى بيتقال فى المناسبات ده سيبكوا منه كل واحد بيدور على إبرة فى كومة قش، لأ الإبرة فى كومة قش أسهل من كده، على الأقل الإبرة لو لقيتها خلاص كده - إند أوف ستورى

أولا معندكش مشكلة تتعرف على الإبرة و تقعد تكسر التلج - بريك ذى أيس
ثانياً مش هتحتار تختار الإبرة دى و لا إبرة تانية ، الإبرة هى إبرة بتلضمها فى الخيط و تشتغل، أول إبرة هتلاقيها هتؤدى الغرض زيها زى غيرها - مش هتفكر بقى هى دى إبرة أحلامى و لا لأ
ثالثاً بقى و الأهم مفيش إبرة بتقول لأ و حتى لو عايزة تقول لأ معندهاش الإمكانيات دى آخرها يعنى ممكن تشُك - مش هتقولك سيبنى أفكر و لا هتقولك إحنا إخوات

الحقيقة مش هو ده الموضوع اللى كنت عايز أتكلم فيه بس أنا كتبت كتير فهكمل فى موضوع جديد :)